На Вялейскім вадасховішчы рыбакі правальваюцца пад лёд. Пакуль абыходзіцца без ахвяраў

Тры рыбакі правальваліся пад лёд Вялейскага вадасховішча ў пятніцу і суботу. Ва ўсіх выпадках абышлося без ахвяраў.

У пятніцу, 27 студзеня, на Вялейскім вадасховішчы каля 17 гадзін 25 хвілін пад лёд параваліўся 38-гадовы рыбак, жыхар Менска. Здарэнне адбылося каля выратавальнай станцыі. Пацярпеламу дапамаглі, прывялі на станцыю і вызвалі “хуткую дапамогу”. Дактары канстатавалі агульнае пераахалоджанне.

Яшчэ двум рыбакам, жыхарам Вялейскага раёна, якія таксама праваліліся на вадасховішчы пад лёд, выратавальнікі дапамаглі ў суботу. Іх пераапранулі ў сухое адзенне, напаілі гарачым чаем. Дапамога дактароў у гэтым выпадку не спатрэбілася, расказаў у інтэрв’ю “РГ” начальнік выратавальнай станцыі Аляксандр Роўда.

Паводле яго слоў, рыбакі актыўна ідуць рыбачыць на лёд пасля ўзмацнення марозу. Між тым, тоўстае снежнае покрыва не дазваляе лёду як след прамерзнуць. На Вялейскім вадасховішчы ён прамерз прыкладна на два сантыметры, і небяспека праваліцца застаецца.

Сяргей ЗЯНЬКО.

© "Рэгіянальная газета"

http://www.rh.by/