Druvis і pARTisan: пра краіну, у якой мы можам жыць

Суботні вечар 26 верасня для некаторых веляйчан, якія прыйшлі на сустрэчу з выдаўцамі часопісаў "pARTisan" i "Druvis", выдаўся цікавым, у нечым новым і, хочацца верыць, запамінальным.

Артур Клінаў, які ўжо ладзіў у нас прэзэнтацыю "Партызана", часопіса сучаснага мастацтва, прадставіў новыя нумары: нумар пра веру, пра горад Сонца Менск, скандальны нумар-каляндар з аголенымі беларускімі літаратарамі і іх творамі. Новыя кнігі свайго выдавецтва прывёз таксама Ігар Логвінаў.



Але асноўная частка імпрэзы прайшла пад эгідай часопіса "Druvis". Аляксей Дзермант, навуковец і укладальнік часопіса, прэзэнтаваў ягоную канцэпцыю і падрабязней спыніўся на другім нумары, прысвечаным Літве - "краіне, дзяржаве, яе народзе, гісторыі і культуры". Стваральнікі часопіса, па словах пана Аляксея, у кожным нумары прапаноўваюць сваю візію той ідэальнай краіны, у якой хацелі б жыць, і запрашаюць іншых людзей, якія адчуваюць сябе, сваю ідэнтычнасць гэтак жа, далучацца да іх у супрацы, розумамі і сэрцамі. Ідучы следам за рамантыкай сваіх ідэй, выдаўцы і аўтары, тым ня менш, рэалістычна падыходзяць да іх ажыццяўлення і падачы: усе артыкулы часопіса паказваюць сур'ёзны навуковы ўзровень працы, глыбокі, вельмі якасны, у многім першаадкрывальніцкі.



Важна заўважыць, што часопіс выдаецца сябрамі Цэнтру этнакасмалогіі "Крыўя", які ўжо шмат гадоў гуртуе вакол сябе людзей розных прафесій - навукоўцаў, мастакоў, краязнаўцаў, музыкаў і інш.



Колькі словаў пра ідэйнае напаўненне працы Цэнтра і часопіса дадаў знаны мастак, майстар, дудар Тодар Кашкурэвіч, які зьяўляецца галоўным рэдактарам "Druvis'а". Дыскусія шмат круцілася вакол назваў нашае краіны - Беларусь, Літва, Крыўя. Вакол таго, як мы яе бачым і на якую будучыню разлічваем. На сустрэчу, трэба сказаць, прыйшлі людзі розных поглядаў, узростаў, ведаў, але гарачых спрэчак гэта не справакавала - дыскусія ўздымала шмат пытанняў, адказы на якія для кожнага прыходзяць у свой час. На маю думку, менавіта "Druvis" - адзінае выданне на сённяшні дзень, якое іх, адказы, і прапануе.

Эліза Волат-Лужынкая